Ya Umm-E-Abiha (SA), Ya Umm-e-Faqeeha
Ya Ashrafun Nisa, Ya Fatima Zahra (SA)
Ya Zahra (SA), Ya Zahra (SA), Ya Zahra (SA), Ya Zahra (SA)

Woh ba-kamaal hai, woh be-misaal hai
Jo phool Fatima (SA) ka, woh la-zawaal hai
Awwaluna Muhammad (SAW), awsatuna Muhammad (SAW)
Aakhiruna Muhammad (SAW), kulluna Muhammad (SAW)

Paalay hain khoon se Abu Talib (AS) ne chaand phool
Ik un mein hai Imam, to hai doosra Rasool (SAW)
Ik asl-e-deen, doosra hai deen ka usool
Jo un ka hai khayaal, Khuda ka khayaal hai

Awwal Imam Ali (AS) hai imamat ka tajdar
Imran ke chaman mein jo laaya nayi bahaar
Jis ko ata ki Khaliq-e-Akbar ne Zulfiqar
Jis ka wajood deen-e-Muhammad (SAW) ki dhaal hai

Baad-e-Ali (AS), Hasan (AS) hai risalat ka aaina
Tora hai jis ne takht-o-hukumat ka aaina
Hai hu-ba-hu Rasool (SAW) ki seerat ka aaina
Kaata qalam se jis ne burai ka jaal hai

Paida hue Husain (AS) jab
Jibraeel (AS) dar pe aaye salami ko ba-adab
Bole payaam deta hai dono jahan ka Rab
Hum ko pasand dil se yeh Zahra (SA) ka laal hai

Ik phool Fatima (SA) ka, ibadat ka zeb-o-zeen
Zain-ul-Aba woh aabid-o-sajid, dil-e-Husain (AS)
Sajde ko jis ke pyar kare Rab-e-Mashriqain
Khutbon mein jis ki tamkanat-e-Zuljalal hai

Baqir (AS) bhi ek phool hai sehn-e-Batool (SA) ka
Jis ki ragon mein khoon Ali (AS) aur Rasool (SAW) ka
Mushkil-kusha jahan mein woh har dil-malool ka
Nasl-e-Abu Jahl ka usi se qitaal hai

Ik Sadiq-ul-khiyal hai, woh Sadiq-ul-wujood
Ja'far (AS) hai Ja'fari ke shajar ki hai woh namood
Maqbool bargah-e-Khuda jis ke hain sujood
Us ke faqr ke tabi Muhammad (SAW) ki Aal hai

Ik laal un ka Musa Kazim (AS), falak-asas
Jis ke badan pe jadd ki shariat ka hai libaas
Ilm-e-Nabi (SAW) ki saari fiza us ke aas-paas
Jadd ki tarah se deen-e-Nabi (SAW) ki woh dhaal hai

Mashhad mein ek laal ka darushshifa bhi hai
Rab ki raza hai us ki raza, woh Raza (AS) bhi hai
Us dar se jis ne maanga hai, jo kuch mila bhi hai
Roze se jis ke khota nahin rad-e-sawaal hai

Taqwa mein ek phool Taqi (AS), ta-hadd-e-khayaal
La-raib woh zamane mein be-misaal-o-be-misaal
Khush-fikr-o-khush-mizaaj-o-khush-bakht-o-be-misaal
Ajdaad ki kitaab ka harf-e-kamaal hai

Ab hai naqeeb-e-haq-o-sadaqat, Naqi (AS) ki baat
Yeh baat hai Nabi (SAW) ki, yahi Ali (AS) ki baat
Burj-e-daham mein aa hi gayi roshni ki baat
Us ke amal se kufr ke sheeshe mein baal hai

Askar (AS)-mizaaj, lashkar-e-imaan, la-lashkari
Qamat mein Mustafa (SAW) hai, jo seerat mein hai Ali (AS)
Us ke pisar (AS) ke dam se qayamat ruki hui
Khamoshiyon mein jis ki bala ka jalaal hai

Tazeem ka hai waqt, ab aaya hai us ka naam
Qaim (ATFS) hai jis ke dam se zamane ka kul nizaam
Naam aaye jis ke lab pe to wajib hua salaam
Ab qaatil-e-Husain (AS) ka bachna muhaal hai

Rehan, wasf-e-Aal-e-Muhammad (SAW) bayaan ho
Madhat-saraai ke liye ik nauha-khwan ho
Sarwar ka jo Nadeem ho, ahl-e-zabaan ho
Is zikr ki asaas mein Rab ka jamaal hai