Waqt rukhsat hai yeh Fatima (SA) ka
Ho chuki hai namaz-e-janaza
Bachay mayyat se lipte hue hain
Aakhri hai yeh deedar maa ka

Nahi hai koi ab apna
Ali (AS) ko chhor kar tanha
Ali (AS) ke ghar ki raunaq ja rahi hai
Janaza uth raha hai Fatima (SA) ka
Haye janaza uth raha hai
Ali (AS) ke ghar ki raunaq ja rahi hai

Bohat zakhmi thi khud lekin Ali (AS) ke zakhm bharti thi
Utha kar haath pehlu se woh aansu saaf karti thi
Ab aansu kaun ponchhe ga, bohat yaad aaye gi Zahra (SA)

Bulaya tha jise maa ne kafan se haath phaila ke
Usay lipta hua dekha to Fizza (SA) ne kaha aa ke
Janazay se Hussain (AS) uth ja, kafan ab chhor de maa ka

Kafan jab bhi hatata hai, tamaacha yaad aata hai
Woh zakhmi maa ka chehra choom ke aansu bahata hai
Hasan (AS) ko gham hai chehre par tamaachay ka nishaan le kar

Sirhanay baith kar Zainab (SA) ne maa ka haath jab chooma
Ali (AS) kehne lage dekha nishaan jab taziyanay ka
Chhupa do Sani-e-Zahra (SA), yeh zakhmi haath Zahra (SA) ka

Na ab lori sunaye gi, na woh jhoola jhulaye gi
Hussain (AS), ab Fatima (SA) kaise tumhein paani pilaye gi
Wasiyat kar gayin Zahra (SA), tumhein paalay gi ab Fizza (SA)

Madine walo ab apne gharon mein chain se sona
Sataye ga na ab tum ko Nabi (SAW) ki beti ka rona
Gira tha jis pe jalta dar, woh tooti pasliyan le kar

Chhura kar maa se bachon ko Ali (AS) ne jab kafan bandha
Tarap kar haye Zeeshan aur Raza kehne lage Maula
Hai taza zakhm pehlu ka, zara aahista do kandha

Ali (AS) ke ghar ki raunaq ja rahi hai
Janaza uth raha hai Fatima (SA) ka
Haye janaza uth raha hai
Ali (AS) ke ghar ki raunaq ja rahi hai