Ya Saree Ar-Riza, Ya Saree Ar-Riza
Ighfir Liman La Yamliku Illad Dua
Fa Innaka Fa'alul Lima Tasha
Ya Man Ismuhu Dawa'un Wa Zikruhu Shifa'un
Wa Ta'atuhu Ghina

Tu Hi Kabeer, Tu Hi Kibriya, Tu Rehnuma
Rag-e-Gulu Se Bhi Nazdeek Tu Har Ek Lamha
Hai Tere Naam Ki Taseer Har Marz Ki Dawa
Hai Tere Zikr Mein Poshida Mere Haq Mein Shifa
Baghair Maange Hi Karta Hai Tu Ata Pe Ata
Sada Se Pehle Hi Sunta Hai Saailon Ki Sada

Ali (AS) Waseela Bane Aur Kumail Paaye Shifa
Usi Ke Naam Se Mansoob Ho Gayi Yeh Dua
Shab-e-Jumma Hai, Dua-e-Kumail, Shukr Tera
Yeh Ibtida Hai To Hai Inteha Hadees-e-Kisa
Ilahi Teri Riza Ke Siwa Kuch Aur Nahi
Ke Mere Paas Dua Ke Siwa Kuch Aur Nahi

Mere Khuda Woh Zabaanein Jo Teri Hamd Karein
Woh Tere Panjtan-e-Pak (AS) Ki Dua Mein Rahein
Kabhi Woh Naar-e-Jahannum Ki Sakhtiyaan Na Sahein
Pul-e-Sirat Se Be-Khauf-o-Be-Khatar Guzrein
Gunahgaaron Ko Yeh Aasra Hai Subh-o-Masa
Khula Hua Hai Musalsal Tera Dar-e-Tauba

Rasool-e-Pak (SAWW) Ke Sadqe Mein Aye Khuda Ghar Ghar
Shua-e-Ilm Ki Kirnon Ka Mustaqil Ho Guzar
Khula Rahe Mere Bachon Pe Shehr-e-Ilm Ka Dar
Rahe Jawano Ki Har Dam Teri Riza Pe Nazar
Teri Riza Ke Bina Rizq-e-Ilm Kya Ho Ata
Jo Tu Na Chahe Dar-e-Ilm Khul Nahi Sakta

Tu Mere Aib Chhupata Hai Daal Kar Parda
Ilahi Deta Hoon Main Tujh Ko Waasta Us Ka
Wohi Jo Shaam-e-Ghareebaan Mein De Rahi Thi Sada
Nahi Hai Kuch Bhi Mere Paas Is Rida Ke Siwa
Rasool Zadi (SA) Ke Parde Ki Laaj Rakh Lena
Bharam Duaon Ka Meri Bhi Aaj Rakh Lena

Shikasta Pehlu-e-Zahra (SA) Ka Waasta Aye Khuda
Jo Waqt-e-Ghusl Ali (AS) Ne Basad Buka Dekha
To Apne Aansoo Ali (AS) Sa Jari Na Rok Saka
Khuda Ka Sher (AS) Bhi Ek Cheekh Maar Kar Roya
Usi Rasool (SAWW) Ki Beti (SA) Ka Waasta Aye Khuda
Ho Walidain Ko Sehat Ke Saath Umar Ata

Woh Ek Mareez Jo Ash-Shaam Keh Ke Rota Tha
Jhukaye Sar Woh Haider (AS) Rota Jaata Tha
Pehan Ke Beriyaan Jo Karbala Se Shaam Gaya
Usi Mareez (AS) Ke Sadqe Se Maangte Hain Shifa
Marz Se Pehle Dawa Khalq Tu Ne Ki Hai Khuda
Baraye Syed-e-Sajjad (AS) De Humein Bhi Shifa

Ilahi, Syedi, Maulai, Ya Azeez-o-Hakeem
Jaleel-o-Qadir-o-Jabbar-e-Aala-o-Azeem
Teri Hi Hamd Hai, Tu Rabb-ul-Alameen-o-Raheem
Gham-e-Hussain (AS) Ke Sadqe Karam Ho Hum Pe Kareem
Sada-e-Sarwar-o-Rehan Sun Mere Allah
Baroz-e-Hashr Ho Saya-e-Rida-e-Zahra (SA) Ka