Khwab mein Zahra (SA) ne Baba (SAW) ko jo dekha aik shab
Khush huin paas mein Baba (SAW) ke chali jaaungi ab
Haye rone lagin bachon ka khayal aa gaya jab
Yeh khabar hi na hui paas Hussain (AS) aa gaye kab
Amma dhoondenge kahan yaad agar aayengi
Hum to mar jaayenge gar aap chali jaayengi

Maa ne jab yeh suna dil tarapne laga, pyar karte hue Fatima (SA) ne kaha
Dekho Hussain (AS) mere Hussain (AS), aise nahin kehte

Maa kisi ki hamesha rahi hai kabhi
Main bhi bichri thi amma se bachpan mein hi
Maa ke jaane ka dukh to bohat tha magar
Dekho main bhi to bin maa ke jeeti rahi
Tum ko meri qasam, tum se bichhre jo hum
Zabt karna hai ae laal maa ka yeh gham

Haal main ne kisi ko sunaya nahin
Khud to royi Ali (AS) ko bataya nahin
Mera pehlu shikasta hai bas is liye
Apne seene se tujh ko lagaya nahin
Tooti hain pasliyan kar na paayi bayan
Kitni takleef mein ji rahi hai yeh maa

Mujh ko maloom hai mere noor-e-nazar
Pyaas lagti hai tum ko bohat raat bhar
Pyaas sehne ki aadat bhi daalo zara
Pyaasa rehna pare kab kahan kya khabar
Pyaas tum ko lage aur na paani mile
Yeh dua hai ke woh din na aaye kabhi

Ae mere dil, mere chain, mere Hussain (AS)
Na pareshan ho, maa abhi hai yahin
Dekho marne ki ab baat karna nahin
Maut se pehle hum mar na jaayen kahin
Tum ho duniya meri, tum se hai zindagi
Tum ko dekhun to chalti hain saansen meri

Tum ko khana bhi Fizza (SA) khilayegi ab
Aur sawere wohi munh dhulayegi ab
Tum jahan jaoge saath jaayegi woh
Saath maa ki tarah woh nibhayegi ab
Palegi ab wohi, zid na karna koi
Khush rahoge to maa ko bhi hogi khushi

Din woh aaya ke jab chal basi Fatima (SA)
Maa ki mayyat pe Shabbir (AS) ne di sada
Tum bulaogi to paas aaunga main
Toote band-e-kafan Fatima (SA) ne kaha
Aa ja ae meri jaan, tujh pe qurban maa
Jab Hussain (AS) aa ke lipte to boli yeh maa

Ae Raza aur Zeeshan dil thaam lo
Ro ke Shabbir (AS) kehte the amma suno
Dekho tum ne bulaya to main aa gaya
Jab bulaunga aaogi, wada karo
Maa ne wada kiya, beta chup ho gaya
Jab janaza utha phir na aayi sada