Ya Zahra, Ya Zahra

Aadhi raat ki taariki mein lekar chashm-e-tar
Mere Maula aa jaate hain qabr-e-Zahra (SA) par
Haye karb-e-Imam-e-Zamana (AS) qabr-e-Zahra (SA) par

Sar ko jhuka kar qabr pe aa kar rote rehte hain
Chupke chupke jaane kya kya Maula kehte hain
Subbat Alayya ki hain sadaayein marqad ke andar

Jaise baad-e-Asr hua tha laash-e-pisar ka haal
Maa ki marqad ko kar daala zaalim ne paamaal
Door talak bas ret hai phaili, mitti aur kankar

Ek shikasta pehlu ki aawaaz mein kya hai dard
Arsh-e-Ilahi kaanp raha hai, chehra-e-deen hai zard
Ashk mein doobi hui mitti hai, rote hain patthar

Ghaibat ke parde mein hoon, mehroomi toh dekhein
Dadi apne pote ki mazloomi toh dekhein
Dadi meri aankhon mein hai Shaam ka har manzar

Raat ki os hai, din ki dhoop ka hai aazaar yahan
Qabr ke upar saaye ka bhi koi nahi imkaan
Jaise Zainab (SA) aur Kulsoom (SA) ke sar pe nahi chaadar

Bayaan:
Bibi (SA) farmaati hain:

Baba! Aapke baad mujh pe woh museebatein aayin
Jo dinon par padtin toh taareek raaton mein badal jaate
Jo pahaadon par padtin toh pahaad surme mein badal jaate

Aaj bhi mahal Shah ke roshan hain
Magar teri qabr-e-mutahhar pe na koi saayebaan hai, na koi diya jalta hai
Ajab nahi ke qabr-e-Paighambar (SAWW) se aawaaz aati ho

Beti teri qabr pe ab tak koi nahi saaya
Jaise tha be-gor-o-kafan Karbal mein tera jaaya
Kehti hai mitti mein ati yeh qabr-e-Paighambar (SAWW)

Arsh-e-Ilahi hilta hai toh taare rote hain
Dadi aapki mazloomi pe saare rote hain
Girya-kunaan hain saare Imam (AS) aur saare Paighambar

Marqad se aati hai sada yeh bint-e-Paighambar (SAWW) ki
Beta tere karb se waaqif hai teri Dadi
Mohsin (AS) ke bhi khoon ka badla waajib hai tujh par

Dadi aapke paas hai ab bhi kurta Asghar (AS) ka
Dadi mujhko bas lena hai Mohsin (AS) ka badla
Aap dua dein khul jaaye bas ghaibat ka yeh dar

Haath mein hai is waqt bhi mere Haider (AS) ki talwaar
Main toh har ek soorat mein hoon aane ko tayyaar
Roke Qamar, Maula ne kaha tayyaar nahi lashkar