Ro ke Zainab (SA) ne yeh Fizza (SA) se kaha, Kya yehi hai hamari Maa Zahra (SA)?
Jis ka ek haath hai pehlu pe rakha, Kya yehi hai hamari Maa Zahra (SA)?

Kham kamar, baalon mein safedi hai
Kam-sini mein zaeefa lagti hai
Haath mein hain sanad ke kuch tukray
Dekh kar jin ko khoon roti hai
Hai nishaan gaalon par tamaanchon ka
Kya yehi hai hamari Maa Zahra (SA)?

Taaziyanon se jism chhalni hai
Thaam kar pasliyon ko roti hai
Larkharati hai, chal nahi paati
Kis qadar yeh zaeefa zakhmi hai
Saans jis se nahi liya jaata
Kya yehi hai hamari Maa Zahra (SA)?

Lab-e-Fizza (SA) se phir hua jaari
Haan yehi Fatima (SA) hain Shehzadi
Dar jala, qatl ho gaye Mohsin (AS)
Kitni takleef mein hain Bint-e-Nabi (SAWW)
Jis ke pehlu se khoon nahi rukta
Haan yehi hai tumhari Maa Zahra (SA)

Sab ne darwaze ko jalaya hai
Jalta dar us pe phir giraya hai
Phir usi dar pe Qatil-e-Zahra (SA)
Apne qadmon se chal ke aaya hai
Jis pe ummat ne har sitam dhaaya
Haan yehi hai tumhari Maa Zahra (SA)

Aye Jari, kya ajeeb manzar hai
Ghusl-e-Zahra (SA) hai aur Haider (AS) hai
Hichkiyaan le ke ro rahe hain Ali (AS)
Haye Ya Fatima (SA) labon par hai
Aur Hasnain (AS) de rahe hain sada
Kya yehi hai hamari Maa Zahra (SA)?