Haye logon ka hajoom aur akeli Zahra (SA)
Jalte darwaze ke neeche thi Nabi (SAWW) ki Zahra (SA)

Apne Maula (AS) ke gale mein jo rasan ko dekha
Haye Ya Ali (AS) kehti hui khaak se uthi Zahra (SA)

Poochta hai yehi behta hua kaanon ka lahu
Ya Nabi (SAWW) aap ki kya beti nahi thi Zahra (SA)

Jaise be-saya rahi dasht mein laash-e-Shabbir (AS)
Is tarah baad-e-Nabi (SAWW) dhoop mein baithi Zahra (SA)

Baat sunne ke liye koi nahi hai tayyar
Kis ko batlaye Ali (AS) teri ghareebi Zahra (SA)

Tum ne Maula (AS) se bhi yeh raaz chhupaye rakha
Aa gayi thi tere baalon mein safedi Zahra (SA)

Parda-e-Ghaib se aati hai Takallum yeh sada
Qabr mein ab bhi hai zakhmi meri Dadi Zahra (SA)